काठमाडौँ – पोखराबाट काठमाडौँ आएका पूर्वराजा ज्ञानेन्द्र शाहको स्वागतमा राजावादीहरूले प्रदर्शन गरेकै दिन नेपालका लागि भारतीय राजदूत नवीन श्रीवास्तवले नेपाली कांग्रेसका सभापति शेरबहादुर देउवालाई भेट्न बूढानिलकण्ठ पुगेका छन्।

आईतबार अपराह्न बूढानीलकण्ठस्थित देउवाको निवासमा भएको भेटमा राजदूत श्रीवास्तव र सभापति देउवाबीच समसामयिक राजनीतिक, कूटनीतिक, र आपसी चासोका विषयमा गहन छलफल भएको देउवानिकट स्रोतले जनाएको छ। यस भेटमा नेपाल–भारत सम्बन्धका विभिन्न पाटाहरू, दुवै देशका साझा हितका मुद्दाहरू, र क्षेत्रीय राजनीतिक परिदृश्यका सन्दर्भमा पनि कुराकानी भएको अनुमान छ । विशेष गरी दुई देशबीचको सम्बन्धलाई थप प्रगाढ बनाउने विषयमा पनि राजदूत श्रीवास्तवले आफ्नो ध्यानाकर्षण गराएका थिए।

राजावादीहरूको प्रदर्शनमा भारतको उत्तर प्रदेशका मुख्यमन्त्री योगी आदित्यनाथको फोटो प्रदर्शन गरिएको विषयलाई लिएर समाजिक सञ्जालमा व्यापक आलोचना भइरहेको छ। कतिपय विश्लेषकहरूले यसलाई भारत–नेपाल सम्बन्धमा थप जटिलता सिर्जना गर्ने प्रयासका रूपमा लिएका छन्। यस्तो संवेदनशील समयमा राजदूत श्रीवास्तवले नेपाली राजनीतिमा महत्त्वपूर्ण स्थान राख्ने नेता देउवालाई भेट गर्नुले चर्चा पाउन थालेको छ।

यस भेटले हालको नेपाली राजनीतिक परिदृश्य, खासगरी राजतन्त्रप्रतिको बढ्दो समर्थन र नेपालको आन्तरिक राजनीतिक चलखेलमा भारतको भूमिका जस्ता विषयहरूलाई पनि जोड दिएको आभास भएको छ। साथै, नेपालको नयाँ संविधान कार्यान्वयन र लोकतान्त्रिक प्रक्रियालाई मजबुत बनाउन दुवै देशबीचको सहकार्यलाई निरन्तरता दिने सन्देश दिएको अनुमान गरिएको छ।

यस भेटघाटको औपचारिक विवरण बाहिर नआएको भए पनि यो कदम नेपाल–भारत सम्बन्धमा रणनीतिक महत्व राख्ने घटनाक्रमका रूपमा हेरिएको छ।